打手？乜嘢叫做打手？
我之前公開推介 ProtonVPN，我無逼你用喎，我只係用自己嘅發表空間寫過數篇文章講 VPN，當時有人話我係打手。
後來我推介 Signal，喺網上同媒體寫過幾篇文章去講呢個軟件，當時又有人話我係打手。
到而家，我打完 BioNTech，我覺得講下自己對呢隻疫苗嘅睇法，又講下打完針之後嘅生理反應，例如有冇頭痛等，居然都有人話我係打手。
打手即係指一啲收咗錢去做宣傳嘅人，呢啲人係咪以為 ProtonVPN 畀錢我叫我唱好佢？定以為 Signal 畀錢我叫我唱好佢？還是以為 BioNTech 畀錢我叫我唱好佢？
唔該唔好咁天真，唔好以為呢個世界乜嘢都要用金錢先可以推動，我自己喺呢個專頁推廣嘅議題，無論係資訊保安又好，無論係社會議題都好，又或者而家講嘅疫苗睇法，都係表達我個人嘅意見。講到我一推動啲話題就等如收咗錢，係顯示呢啲人嘅眼光何其狹窄。
記得 2019 年有個深藍到紫嘅舊同學，質疑我寫文嘅目的，講到我好似收咗外國唔知乜機構嘅錢咁。我當時就明白，佢咁諗，係因為佢眼裡就只有錢，喺佢哋眼中，任何人嘅行動動機都一定同錢有關。佢哋心諗如果自己無收錢就一定唔會講嘢，無收錢就一定唔會做嘢。或者因為喺佢哋嗰個陣營，確實就有一大堆維穩經費去維持動機，所以就覺得全世界都要好似佢哋咁靠金錢先可以維持動機。
世界上總有啲人，只能用佢哋狹隘市儈嘅思維去理解世界及理解他人，佢哋自己易被收買，所以佢哋覺得任何人都易被收買。佢哋夢想做打手，所以覺得全世界都係打手。
注：有人話，BioNTech 係打手（臂）喎，哈！
Search